Nakafile na sang kaso ang 41 ka mga biktima sang pagpangscam sang Sangguniang Bayan member sang La Castellana nga si Donato ‘Natnat’ Dumaguit nga nagpasalig nga makasulod sila sa Philipine National Police kag minilyon ka pesos ang nakuha sa mga biktima.
Sa interview sang Bombo Radyo kay Police Major Mary Grace Borio, spokesperson sang Police Regional Office 6, padayon sa gihapon ang imbestigasyon sang Police Region Office 6 sa natabo nga pagpangscam ni Councilor Dumaguit kag sa nagpakilala nga recruiter nga si Mary Jun Delos Santos nga amo ang mabulig sa mga biktima nga makasulod sa PNP.
Suno diri, gikan sa 47 ka mga nagcomplain, 41 diri ang nakafile na sang kaso batok sa SB member.
Ginklaro ni Borio sa publiko nga wala sang agent ukon representative man ang PNP nga ginhatagan sang authority nga magbaton sang application bangod istrikto sila sa pagprocess sa mga applicant dugang pa nga faceless kag nameless ang ila recruitement process kag tanan ang naga-agi sa QR code system.
Ginkasubo man sini nga nagkabit sa amo nga pamaagi ang mga nabiktima bangod sa luyag nga makasulod sa PNP.
Panugyan ni Borio sa tanan nga luyag mag-apply sa PNP nga magsalig sa ila kaugalingon kag hangkaton ang kaugalingon nga mag-agi sa husto nga proseso.
