Aminado ang public information officer sang Land Transportation Office 6 nga sa kapin 200 ka mga nagkaladakpan sa One Time Big Time kag joint operation nga ginpatigayon sang Disyembre 2, kalabanan diri ang taga Negros Occidental.
Sa interview sang Bombo Radyo kay Riza Otayde, ginpahayag sini nagpatigayon sila sang One Time Big Time kag joint operation kaupod ang Regional Highway Patrol Group, Land Transportation Franchising and Regulatory Board (LTFRB) kag local government unit sang tinalikdan nga Disyembre 2 agud matsekyar ang mga dokumento sang mga motorista kag masigurado ang safety sang riding public.
Suno kay Otayde, madamo ang naapprehend kag ila ang mga ini gin-issuehan sang temporary operator permit kag citation ticket.
Suno diri, ila ginamonitor ang mga indi rehistrado, wala sang lisensya kag wala nagsuksok sang seat belt nga amu ang may pinakamadamo nga apprehension.
Suno sa tagpamaba, malapit 200 ang ila mga nagkaladakpan kag kalaban diri ang nagikan sa Negros Occidental bangud dako ang scope sang probinsya.
Nagapangabay man ini sa mga pumuluyo nga magsuksok sang nagakaigo nga equipments ilabi na sang seat belt agud masalbar in kaso nga may yara sang aksidente.
Nagapangayo man ini sang bulig kag kooperasyon sa mga Negrense nga sundon ang gina-implementar nga mga pagsulundan kag unahon ang kaluwasan sa dalanon.
