Halos tanan nga pumuluyo sang Barangay Handumanan kag Barangay Mansilingan diri sa ciudad sang Bacolod ang nagapabor sa Joint Venture Agreement sa tunga sang CENECO kag More Power.
Sa interview sang Bombo Radyo kay Punong Barangay Ricardo Danoy sang Barangay Handumanan, simple lang ang rason para sa iya kun ngaa madamo sa ila ang nagsuporta sa JVA , ini bangod sa indi maayo nga serbisyo sang CENECO.
Suno diri, ang mga appliances sang ila barangay nagkalaguba kag gingastuhan na sini pakay-o apang amo man sa gihapon bangod sa power fluctuaiton.
Isa sa mga naguba sa ila nga appliances amo ang TV nga ila ginagamit sa pagmonitor sa mga CCTV.
Luyag sini nga hatagan sang tyansa kag makita kun ano ang mabulig sang Prime Electric sa ciudad sang Bacolod.
Madamo na sang mga constituents sini ang nagpadangat sang reklamo nga madasig mag-utod ang CENECO apang sa serbisyo ma-uyaya.
Samtang, sa interview sang Bombo Radyo kay Punong Barangay Rodolfo Pico sang Barangay Mansilingan, nagaduha-duha pa una ini kun madaog ang JVA sa ila nga barangay, ini bangod nga madamo sang mga nagakabalaka nga kun ang serbisyo nga ila makuha sa JVA ang mangin kaangay sa serbisyo sa karun sang BACIWA -Primewater.
Apang matapos ang kampanya para sa JVA sa ila barangay nga ginpatigayon kahapon, madamo sang nag-attend kag sa karun dako ang pagpati ni Pico nga madamo na ang nagasuporta sa JVA.
Samtang, ginkaangay sini sa christmas lights ang sitwasyon sang patay-siga sang suga sa idalom sang serbisyo sang CENECO.
Madamo man sang nagkalaguba nga mga appliances kag ini tanan ginreklamo sang mga pumuluyo sa barangay apang suno kay Pico wala man ini sang may mahimo gani sila ginrefer lang sa CENECO, apang kun tawagan naman ang kooperatiba, wala sang may nagasbat.
Suno diri, nakita sini ang maayo nga trabaho sang Prime Electric sa ciudad sang Iloilo gani isa na ini ka basehan para sa ila.
