Kalabanan sa mga nasunogan nga pumuluyo sang Purok Tambi Palad, Brgy 10, Bacolod City, wala gid sang may nasalbar nga mga gamit.
Sa interview kay Nadine Abellar, ginpamangkot ini sang iya kaingod kun bala may sunog sa likod sang ila balay.
Suno diri, naggwa ini kag didto na sini nakita ang madamol nga aso kag sang ginlili sini ang gin-abandonar nga balay sa likod sang ila balay, nakita sini nga dako na ang kalayo.
Naghingagaw pa si Abellar paandar sang gripo sa banyo apang nakasulod na ang kalayo.
Nagtuyo pa ini nga kuhaon kun tani sa ila kwarto ang importante nga mga dokumento kag kwarta apang wala na sini nahimo bangod may kalayo naman sa ila nga salas.
Nagbinuligay pa ang mga tawo agud matapna ang kalayo apang nabudlayan na sila bangod sa makusog nga hangin nga nagahuyop sa dereksyon padulong sa mga balay.
Pahayag ni Abellar, wala gid ini sang may nasalbar nga mga gamit nila amo nga nagapangayo ini sang bulig sa kun sin-o man ang makahatag sang bayo ilabi na sa iya mga bata.
