Nagapanawagan ang Bacolod Police Station 5 sa kun sin-o ang may namissing nga himata kasunod sa pagkasapo sang kalabera sang tawo sa tunga sang kampo sa Hda Garcia, Purok 9, Brgy Alangilan, Bacolod City, kaina kapin alas- 7:00 sang aga.
Sa interview sang Bombo Radyo Bacolod kay Police Captain Portia Nillosan, station commander sang Bacolod Police Station 5, nakit-an sang mangunguma nga si Elena Baclas ang kalabera sa tunga sang kampo sang nagapanapas ini sang tubo.
Una nga nakita ni Baclas ang bagul kag nagtawag ini sang bulig sa iya mga kaupod.
Suno kay Nillosan, sa paglibot sa area nakit-an nga nagalapta ang mga tul-an kaangay sang pelvic bone, ribs kag tul-an sang tiil samtang wala naman sang may nakit-an nga mga panapton.
Ginapatihan naman nga kapin sa anum ka bulan na nga nagatinir sa kampo ang bangkay tubtob nga nangin kalansay.
Nagpanawagan ini sa karun sa kun sin-o man ang may namissing nga himata nga makig-angot lamang sa Bacolod Police Station 5.
