Natalana nga ipaidalom sa skeletal examination kag DNA testing ang tul-an sang tawo nga nadiskubrihan sa Hacienda Gonzaga, Brgy. Mansilingan, sa ciudad sang Bacolod, Martes sang aga, Nobyembre 10.
Sa interview sang Bombo Radyo Bacolod kay Police Capt. Jay-R Reyes- Station Commander sang Bacolod Police Station 7, nag-request ini sa crime laboratory nga ipaidalom sa examination ang nasapwan nga mga tul-an sang tawo agud nga matumod kun babayi ukon lalaki.
Suno kay Reyes, napat-od nga tul-an sang tawo ang nasapwan bangud may yara sang skull ukon bagul.
Suno sa station commander indi pa matumod kun taga Barangay Mansilingan ini apang may posibilidad nga ginbilin lamang bangud ang tubo ang natapas naman sang tinalikdan nga semana.
Ginpahayag man sini nga may yara sang residente sang Talisay nga nagpadulong sa Bacolod Police Station 7 bangud nga may nadula ini nga himata sang Abril apang gin-abisuhan nga hulaton ang resulta sang examination.
