Aminado ang isa sa mga board member sang Sugar Regulatory Administration nga mas malas-ay ang kalamay sini nga tuig kun ikumparar sang 2019 bangud nagnubo sang 0.1 ang purisa sini.
Sa interview sang Bombo Radyo kay Atty. Dino Yulo, ginpahayag sini nga mas magamay ang katam-ison sang kalamay sini nga tuig bangud nagikan sa 1.7 nga purisa sang 2019, yara nalang ini sa karun sa 1.6.
Suno kay Yulo, ini bangud masobra isa ka bulan nga nangin maulanon ang tiyempo sa probinsya kag apektado sini ang tapas bangud kun basa ang tubo, nagapanaog man ang purisa sini.
Gindugang man sini nga sang una bulan pa sang Enero ginagaling ang mga tubo apang bangud sa kahangawa sang mga sugarcane workers kag kakulangan sa pinansyal tuga sang COVID pandemic, madamo ang nagagaling na sang tubo sang timprano.
Suno sa iya, kun pulo pa lang ka bulan ang tubo kag galingon na ini, manubo gid ang turisa.
Nagapasalamat man ini nga apisar sang pandemic, nagsaka ang demand sa raw sugar sang tinalikdn nga mga binulan kag nagsaka man ang demand sang brown sugar sang nagliligad nga semana bangud sa tigkalalag.
Suno sa board member, yara sa karun sa P45 ang presyo sang raw nga kalamay samtang P50 naman ang average retail price sang refined sugar.
Nanaog naman sang malapit P200 ang presyo sang wholesale.
Suno kay Yulo, yara pa lang sa karun sang 25% sang mga tubo ang napangtapas kag nagalaom ang SRA sang mas accurate nga resulta sa Disyembre.
