Totally damaged ang isa ka kalan-an sa Purok Progreso, Barangay Sum-ag, Bacolod City matapos masunog kagab-i.
Sa impormasyon nga nakuha sang Bombo Radyo, ang duha ka panalgan nga residential house nga may kalan-an kag inasalan, ginapanag-iyahan ni Florence Hong Orlindo ang nasunog alas 9:10 sang gab-i.
Gilayon naman nga nagresponde ang mga katapo sang Bureau of Fire Protection kag ini ang natigayon nga nafire-out alas 9:41 sang gab-i.
Yara sa first alarm ang sunog samtang wala naman sang may nasamaran ukon napilasan sa insidente.
Nagdangat sa P75,000 ang balor ang halit nga gintuga sang sunog sa nasambit nga kalan-an.
Sa karun ginahibalo pa sang mga otoridad ang gintunaan sang kalayo nga santo sa inisyal nga imbestigasyon, sa northeastern portion sang ground floor nagsugod.
