Ginaalegar tul-an sang isa ka tawo ang nasapwan sa sulod sang kampo sang tubo sa Hacienda Garcia, Barangay Alangilan, cuidad sang Bacolod kahapon sang aga.
Sa interview sang Bombo Radyo Bacolod kay Police Captain Portia Nillosan, station commander sang Bacolod Police Station 5, gindala na sang mga ini sa punerarya ang nasapwan nga mga tul-an.
Suno kay Nillosan, hulaton na lang kun may magclaim sang nasambit nga tul-an sang tawo agud mahibaluan ang identity sini.
Wala man sang bisan ano nga butang ang makita sa lugar nga mahimo makatumod sang identity sang biktima.
Ginapahayag man nga lapta-lapta nga nakita ang tul-an sang tawo.
Suno kay Nillosan, malayo ang antad sang mga tul-an gikan sa bagol nga una nakit-an sa nasambit nga katubuhan.
Nagrequest naman sila sang DNA tests agud nga matumod kun sin-o ang nagapanag-iya sang mga nasapwan nga tul-an.
Kapin isa ka semana ang hulaton agud nga magwa ang resulta sang DNA test.
