Magakonsulta pa ang punong barangay sang Barangay Granada sa Bacolod City Engineer’s Office kun sarang mapalos ang street light nga yara sa tunga sang dalan sa Bacolod Negros Occidental Economic Highway (BANOCEH).
Sa interview sang Bombo Radyo Bacolod kay Punong Barangay Armando “Nogi” Vito, siya mismo ang nagrequest nga mahamtangan sang traffic enforcers ang intersection sang BANOCEH partikular na halin alas-5:00 sang hapon tubtob alas-7:00 sang gab-i.
Sa karun isa man sa concern sini amo ang kalog nga yara sa tunga nga bahin sang karsada.
Ini bangod dako ang tyansa nga makatuga sang aksidente ang kalog ilabi na nga madulom ang area kag wala man sang may nabutang nga warning device agud malikawan sang mga motorista.
Apang ini ang wala pa mahimuan sang tikang bangod ang contractor sa dalan ang gikan pa sa Department of Public Works and Highways (DPWH) Region 6.
Nagpadala naman ini sang sulat, apang sa karun padayun pa nga ginahulat ang response sang ahensya.
Sa pihak nga bahin, isa man sa ginakahangaw-an amo ang street light nga ginhamtang sa tunga sang dalan antes ang intersection.
Bangod madulom sa lugar, ginakahangawa nga ini ang indi makita sang mga motorista kag mabungguan.
Suno kay Vito, subong nga adlaw, magakonsulta ini sa Bacolod City Engineer’s Office kun ini ang paluson, ukon ini ang mahimo na lamang mapalos sang mga tawo niya sa barangay.
Kun wala sang jurisdiction ang Bacolod City Engineer’s Office, siya ang sunod nga magakonsulta sa DPWH Bacolod.
