Nakigkita si Vice President Kamala Harris sa mga top candidates agud mangin running mate sini sa 2024 US Presidential elections agud testingan ang chemistry nila sang iya potential partner.
Ang tatlo ka mga leading contenders nga sanday Senator Mark Kelly sang Arizona, Gov. Tim Walz sang Minnesota kag Gov. Josh Shapiro sang Pennsylvania ang nakighinun-anon kay Harris sa iya puluy-an sa Naval Observatory sa Washington.
Nahibaluan nga ginaprioritize ni Harris ang personal rapport sa iya mga staff kag advisers suno sa iya mga aides kag associates kag ginalauman nga magapatigayon pa sang madamo nga mga in-person meetings.
Ginalantaw nga igaanunsyar sini ang iya mapilian nga vice-presidential candidate antes sila magsugod sa isa ka tour sa battleground states sa Martes.
Ginabantayan man sa karun kun madayon ang debate sa tunga ni Republican candidate Donald Trump kag sang bise-presidente.
