Ginahulat nalang sa karon ang schedule nga italana sang committee on local government sa House of Representatives agud nga makapatigayon sang committee hearing angot sa hagna nga magatunga sang ciudad sang Bacolod sa duha ka legislative district.
Sa interview sang Bombo Radyo kay Bacolod City Lone District Rep. Greg Gasataya nga amo ang author sang hagna, narefer na ang House bill sa committee on local government nga ginapamunuan ni Congressman Rex Gatchalian.
Suno diri, ginahulat nalang kun san-o ang schedule sang hearing bangud handa naman ang tanan nga papeles nga kinahanglan.
Sa hearing suno kay Gasataya, igapresentar sa komitiba ang mga rationale kun ngaa kinahanglan tungaon sa duha ka legislative district ang Bacolod.
Naistorya naman ni Gasataya si House Speaker Martin Romualdez sang Lunes kag iya nga ginpahibalo nga may ginfile ini nga bill para sa reapportionment sang Bacolod sa duha ka distrito.
Hopeful naman ang kongresista nga makalampuwas sa Kamara ang hagna bangud may mga abyan man ini sa Senado nga mahimo magsponsor sang bill para diri.
Aminado si Gasataya nga basta maayo ang relasyon sa mga kaupod, mahapos ang trabaho.
Suno kay Gasataya, ginaduso niya ang kaangay sini nga programa kag proyekto sa tinutuyo nga mas mag-umwad ang ciudad sang Bacolod.
