Ginpaathag ni Lanao del Sur Rep. Zia Alonto Adiong nga samtang ginarespeto sang Kamara ang Office of the Vice President (OVP) sa tion sang deliberasyon sa ila ginaduso nga 2027 budget, wala ini nagakahulugan nga mahilway na ang OVP sa maid-id nga pagpang-usisa sang mga mamalidha.
Suno kay Adiong, nagapabilin ang courtesy sang Kamara sa OVP, apang indi ini dapat mangin rason agud indi na kwestyunon ang ginahingyo nga pondo sang talatapan.
Kasunod ini sang paghanda sang Kamara para sa hearing sa proposed budget sang OVP nga P785.2 million para sa 2027, nga mas nubo kumpara sa P889.23 million nga pondo sini nga tuig.
Ginpahayag man ni Adiong nga ginalauman sang Kamara nga personal nga magtambong si Vice President Sara Duterte sa budget deliberations, bangud may kinamatarong ang mga tiglawas sang pumuluyo nga magpamangkot tuhoy sa paggamit sang pondo sang isa ka ahensya.
Natalana nga talakayon sang House Committee on Appropriations ang budget proposal sang OVP sa Setyembre 2, sa diin nakalista bilang tiglawas sang talatapan si Chief of Staff Zuleika Lopez.
Madumduman nga nangin sentro sang mga nakaligad nga budget hearings ang paggamit sang pondo sang OVP, kalakip ang confidential funds, nga isa man sa mga isyu nga ginatalakay sa impeachment trial batok kay Vice President Duterte sa Senado.
