BACOLOD CITY — Paimbestigaran sa Kamara de Representantes ang kamatayon sang 17-anyos nga sulterito nga gintiro sang isa ka pulis sa daan nga airport sang Bacolod sa Barangay Singcang sang Oktubre 19 sang hapon.
Sa exclusive interview sang Bombo Radyo kay Bacolod City Lone District Congressman Greg Gasataya, magahimo siya sang resolusyon nga magahingyo sa Kamara nga usisaon ang kamatayon sang biktima nga si Archie Filonco Odsigue sang Villa Esperanza, Barangay Tangub.
Bisan si Gasataya ang indi kumbinsido sa pahayag sang Bacolod City Police Station 8 nga nag-ricochet ukon nag-umpok ang bala sang nag-warning shot si PO2 Ryan Sagon kag naigo ang biktima sa nalikod nga bahin sang ulo.
Bangud sini, gilayon nga makig-angot si Gasataya kay Police Regional Office 6 director Police Chief Superintendent Cesar Hawthorne Binag agud hingyuon nga usisaon ang nasambit nga insidente.
Suno sa kongresista, indi niya luyag nga may yara sang ginatago ang mga pulis kag magaduda ang mga tawo tuhoy sa matuod nga natabo.
Natingala man ang mamalidha nga wala sang restriction nga gindagdag batok kay PO2 Sagon bisan pa nga nakapatay ini.
Magapatigayon man sang imbestigasyon ang National Police Commission (NAPOLCOM) Region 6 angot sa kamatayon sang 17-anyos.
Sa interview sang Bombo Radyo kay Allen Camering, spokesperson kag imbestigador sang NAPOLCOM Region 6, makig-angot sila subong nga adlaw kay PRO 6 Director Chief Supt. Cesar Hawthorne Binag para sa imbestigasyon sa kamatayon ni Odsigue.
Suno kay Camering, makig-angot sila sa PRO 6 Director agud nga sila ang makapadulong sa ciudad sang Bacolod para sa imbestigasyon kag sa posible nga pagpasaka sang kaso kriminal kag administratibo batok sa natungadan nga pulis.
Lantawon man sang NAPOLCOM kun nakapasaka na sang kaso ang pamilya sang biktima bangud nga kun wala pa handa nila ini nga buligan.
Suno kay Camering, kun mapamatud-an sa imbestigasyon nga si PO2 Sagon ang nakatiro sa biktima pasakaan ini sang kaso administratibo nga Grave Misconduct nga isa ka grave offense kun sa diin dismissal from service ang pinakamataas nga penalidad.
Manabat man ang commander sang Bacolod Police Station 8 kun mapamatud-an sang NAPOLCOM Region 6 nga wala sini ginpapanaugan sang sanction ang pulis nga gin-alegar nakatiro sa 17-anyos.
Suno kay Camering, mahimo mapasakaan kaso administratibo nga grave neglect of duty si Senior Inspector Wilfredo Benoman kun mapamatud-an nga nagpabaya ini kag wala ginhatagan sanction si Sagon.
Kun may ebidensya suno kay Camering, ipaidalom ang chief of police sa pre-charge investigation kag kun may probable cause ipasaka ini sa summary hearing proceedings kag kun mapamatud-an nga nakasala, ini siya ang sentensiyahan sang commission en banc.
Magadepende naman sa en banc kun bala dismissal form service, demotion in rank ukon suspension ang ipapanaog sa station commander.
Ginapasiguro naman sang NAPOLCOM 6 nga magaagi ini tanan sa legal nga proseso.
