Na-utod ang kamot sang 29 anyos nga lalaki matapos ginlabo sang iya kaingod sa Sitio Balogo, Brgy Magallon Cadre, Moises Padilla, Negros Occidental.
Ang suspetsado ang ginkilala lamang nga si Alyas Rico, 43 anyos, single, laborer, nga residente man sa lugar.
Nakita sang personnel sang Moises Padilla Municipal Police Station nga may-ara sang komosyon alas-11:40 sang Martes sang gab-i samtang sila ang nagapatigayon sang mobile patrol.
Sa pag-aboy sa lugar, naabtan nila ang biktima nga duguon, nga nagahilibion kag nagapangayo sang bulig.
Gilayon man ini nga gindala sa Moises Padilla Infirmary, antes ginsaylo sa Isabela District Hospital para sa pagbulong.
Sa inisyal nga imbestigasyon, nahibaluan nga ginsulong sang suspect ang balay sang biktima kag ginsinggitan nga maggwa.
May natabo man nga mainit nga pagbaisay sa tunga sang duha tubtob nga naggwa sa balay ang biktima.
Apang hinali na lamang ini nga ginlabo sang suspect sang makaduha ka beses gamit ang espading.
Ang pagpanglabo ang nagresulta sa pagka-utod sang nawala nga kamot sang biktima.
Gilayon man nga naaresto ang suspect kag narecover man ang gingamit sini nga espading.
