Nagpungko kag nakighinun-anon si President Ferdinand Marcos Jr. kaupod ang mga nalisdan sang mga biktima sa assassination ni Negros Oriental Governor Roel Degamo sang nagpadulong ini sa haya sang gobernador sa Barangay Junob, Dumaguete City kahapon.
Sa interview sang Bombo Radyo kay Dumaguete City Mayor Felipe Antonio Remollo, nagdugay sang kapin duha ka oras ang pagtinir sang Presidente sa puluy-an ni the late Governor Degamo kun sa diin nakahaya.
Suno sa iya, nagpakig-unong ini sa asawa sang gobernador nga si Pamplona Mayor Janice Degamo kag sa ila pamilya.
Suno kay Remollo, nag-istorya man si Marcos sa pamilya sang walo ka iban pa nga napatay sa assassination.
Suno diri, makit-an ang sinceridad sa Presidente bangud apisar sang kadamuon sang tawo nga nagapalibot sa iya, nagafocus ini sa mga nalisdan.
Suno sa alkalde, nagpalab-ot sang personal kag official concerns ang pamilya sang mga biktima kaangay sang ila palangabuhian kag scholarship sang ila mga kabataan, nga ginapanglista naman sang mga personnel ni Marcos.
Kampante si Remollo nga pagasabton kag respondehan sang gobyerno ang tanan nga concerns nga ginpalab-ot sang mga nalisdan.
Nagapati naman ini nga indi lamang sa Negros Oriental nagakatabo ukon matabo ang kaangay nga insidente kag ginpahayag nga isa ini ka conspiracy sa bilog nga Pilipinas kun sa diin imbolbado ang illegal drugs, gambling kag prostitution.
Posible suno diri nga nagahulamay lamang sila sang mga conspirators kag ginakasubo sini nga imbolbado ang mga anay miyembro sang Philippine National Police kag Philippine Army.
Suno sa iya, kanugon lamang sang training nga nakuha sang mga ini sa gobyerno bangud ila lamang ginpagamit sa malain nga mga elemento.
Indi naman sini luyag nga ikondenar ang kapulisan apisar sang ginalantaw nga poor intelligence report sa PNP sang nangayo sang dugang nga security sadto si Governor Degamo.
Nagalaom ini nga madakpan gilayon ang mga suspetsado kag ang mastermind sa insidente.
