Kasunod sang proklamasyon sang Grupo Progreso nga nagfile na sang Election Protest si Bacolod City Mayor Evelio “Bing” Leonardia, nagpagwa man sang statement si Bacolod City Mayor-elect Albee Benitez nga ini ang wala sang basihan kag despirado na nga tikang.
Pahayag pa ni Benitez nga indi mabatun ni Leonardia ang kamatuoran nga ini ang wala na ginboto sang pumuluyo.
Paathag sini nga nangin generally peaceful, credible kag orderly ang pagpatigayon sang May 9 Elections sa syudad sang Bacolod kag wala sang nakita nga irigularidad.
Suno diri ang tikang ni Leonardia nga pagfile sang Election Protest ang makabig nga “exercise of futility”.
Samtang sa paathag ni Dr. Chris Sorongon, spokesperson sang Grupo Progreso, si Mayor Bing Leonardia ang nagfile sang election protest sang Mayo 20 sa mismo nga national headquarters sang Commission on Elections sa Manila.
Ang grounds sang mga ini amo ang massive vote buying kasubong man ang gina-alegar ginapahanugutan nga makaboto nga mga fake voters kasubong man ang manipulasyon sa ginapagwa nga resulta sang vote counting machines.
Paathag sang Grupo Progreso nga ini ang nagtuga sang misteryoso kag indi mapatihan nga resulta sang eleksyon.
Ginalauman sang mga ini nga makapatigayon sang manual counting kag kun mapamatud-an sang Comelec nga may basihan ang Election Protest kag madeklarar ang failure of election, makapatigayon naman sang Special Election sa syudad.
Panindugan ni Sorongon nga makita sa ila mga pagkampanya ang tuman ka damo nga suporters ni Leonardia gani makaduluda ang resulta sang eleksyon kun sa diin nagdangat sa 60 mil ang deperensya sa boto.
Pahayag ni Sorongon nga ang luyag lang ni Leonardia amo ang mabal-an ang kamatuoran, kun ano ang luyag sang pumuluyo kag mapabilin ang pagkasagrado sang pagboto.
