Ginpasalig sang kampo ni Mayor Bing Leonardia nga mangin smooth ang transition sa administrasyon ni mayor-elect Albee Benitez.
Sa interview sang Bombo Radyo kay Bacolod City Administrator Edward Joseph Cuansing, handa ang Leonardia administration para sa transition kun sa diin magasapol ini sa mga department heads nga magabug-os sang team.
Suno kay Cuansing, in compliance sa Department of Interior and Local Government (DILG) requirements, nakadihon na sila sang local government transition team kag ini ang natukod sang Abril 7, 2022 pa.
Suno diri, ang local government transition team ang pangunahan sang alkalde kag ini ang nasanto sa memorandum circular sang DILG.
Meetingon pa sini ang mga department heads agud nga masugudan na preparar ang mga dapat iturn over nga mga dokyumento sa mga bag-o nga magapungko sa syudad kag sa bulig man sang DILG.
Natalana nga magameeting si Mayor Bing sa local government transition team kun sa diin ang mga miyembro sini ang mga department heads kaupod man ang lokal nga DILG.
Samtang nagpanindugan man si Cuansing nga ara sila nanday Mayor Bing sang nagtransition sang time ni Mayor Monico Puentevella sang 2016 baliskad sa ginpahayag sang tagpamaba ni Puentevella nga wala sila naestorya sang nagtransition sila sadto.
Una na nga ginpahayag ni Cuansing yara na ini sa administrasyon ni Leonardia humalin pa sang 2011 sa idalom sang City Legal Office.
Nag-upod man ini sang nangin kongresista si Mayor Bing sadtong tuig 2013 kag kasubong man sa pagbalik sini bilang alkalde sang 2016.
Aminado man ini nga nasubuan siya apang batunon sini ang reyalidad kag siya ang nagapati nga kun may magasara nga peertahan para sa ila, may ara man nga magabukas nga panibag-o.
Pasalig sini nga magapabilin ang ila nga commitment sa pagserbisyo sa mga Bacolodnon kag kun liwat nga mahatagan sang tyansa sa masunod nga tion, siya ang malipayon gihapon nga magaserbisyo sa pumuluyo sang Bacolod City.
