Nagapati ang isa ka Pinoy sa Nevada nga dako pa ang tsansa nga maka-abanse si Republican nominee Donald Trump kay Democratic nominee Joe Biden kun maisip ang mga provisional ballots.
Nahibaluan nga masobra 120 mil ka mga provisional ballots pa ang nabilin nga ilisipon sa Clark County sa Nevada.
Sa interview sang Bombo Radyo Bacolod kay Bombo International Correspondent Raul Sabido direkta sa Nevada, ginpahayag sini nga kapin 63,262 ka mga balota ang kinahanglan nga mapasulod sa ila nga system tubtob sa Domingo.
‘Kalabanan sa ini nga mga balota ang mail-in votes.
Samtang, ang dugang naman nga 60 mil ka mga provisional ballots nga na-cast electronically kag in-person sang Election Day ang kinahanglan pa nga ireview kag indi pa matul-id kun pila ang madala sa final tally.
Suno kay Sabido nga isa sa mga core leaders sang Trump supporters sa Nevada, ila ginahingagaw nga ma-cure sang mga botante ang ila nga mga provisional ballots agud nga madala isip ang ila nga boto.
Ginhatagan ang estado sang Nevada tubtob sa Nobyembre 12 agud nga ma-cure ang mga balota kaangay na lamang sa pagtumod sang mga kulang nga witness signature ukon voter signature irregularities agud nga indi pag-ibasura ang ila nga balota.
Suno kay Sabido, kalabanan sa mga provisional ballots ang iya ka Republican gani nagapati ini nga kun ma-cure kag maisip ang ini nga mga balota, sarang pa makuha ni Trump ang Nevada nga may yara sang 6 electoral votes.
Nahibaluan nga anom na man lang ka electoral votes ang kinahanglan ni Biden agud makalab-ot sa 270 nga kinahanglan para makuha ang kadalag-an padulong sa White House.
