Natalana nga gamiton sang kampo sang aktor kag TV host nga si Vhong Navarro ang tanan nga nabilin nga legal remedies kasunod sang mando sang Court of Appeals (CA) nga hilwayon na sanday Deniece Cornejo kag Cedric Lee.
Suno sa pahayag sang abogado ni Navarro nga si Atty. Alma Malonga, padayon nga nagasalig ang kliyente sini sa sistema sang hustisya sa pungsod sa pihak sang mga kakulangan sini.
Ginpaathag sang legal counsel nga ginbag-o sang CA ang sentensya sang duha sa grave coercion gikan sa mas mabug-at nga reclusion perpetua para sa kaso nga serious illegal detention nga ginpamatbat sang Mayo 2024 sang Taguig Regional Trial Court.
Ginkumpirma man sang Bureau of Corrections (BuCor) nga nagapakig-angot na sila sa appellate court agud nga tsekyaron ang mga record kag computation of served sentence antes ipatuman ang paghilway sa duha.
Nagapabilin nga preparado si Navarro nga respetuhon kag batunon ang mangin ulihi nga desisyon sang korte sa tion nga natapos na ang bug-os nga proseso sang layi.
