Ginpanindugan sang kampo ni Vice President Sara Duterte nga may paathag ang Office of the Vice President (OVP) sa paggamit sang P125 million confidential funds sa sulod lamang sang onse ka adlaw sadtong Disyembre 2022.
Sa isa ka press briefing, ginpahayag sang defense counsel nga si Atty. Michael Poa nga wala sila nag-ugyon sa stipulation sang prosecution nga gingastos ang bug-os nga P125 million sa sulod sang onse ka adlaw bangud mahimo pa ini mapa-athag paagi sa cross examination.
Apang, ginpahayag sini nga nag-ugyon ang ila nga kampo nga batunon bilang stipulated facts ang pila ka mga dokumento nga ginsumiter sang OVP sa Commission on Audit (COA).
Sa ika-onse nga adlaw sang impeachment trial, nag-atubang bilang testigo sang prosecution si anay COA-Intelligence and Confidential Funds Audit Office state auditor Roderick Wamil.
Suno kay Poa, wala naman sang bag-o nga testimoniya si Wamil kag nagasanto ini sa mga nauna na nga findings sang COA nga ila na nabasa.
