Nag-file sang complaint sa Games and Amusement Board (GAB) ang kampo sang boksingero nga si Eman Bacosa Pacquiao batok sa iya nangin kontra nga si Rodelyn Perez sa ulihi niya nga hampang kag sa referee nga si Jerold Tomeldan.
Suno sa kampo ni Eman, sulit-sulit kag hungod nga gin-igo si Eman sang rabbit punches ukon sumbag sa likod sang ulo nga isa ka illegal strike.
Nakontra ni Eman si Perez sang Hunyo 21 para sa PBF Youth Lightweight Title kag nagdaog si Perez paagi sa majority decision kun sa diin nangin referee sa hampang si Jomeldan.
Suno sa manager kag iloy ni Eman nga si Joanna Rose Bacosa Dino, normal lang sa mainit nga boxing nga may masakitan ukon may rabbit punch apang wala dapat ini ginahungod.
Dugang pa, indi ini bangud nadaog ukon napierde sila.
Bangud ang pinaka-importante sa ila amo ang ikaayung lawas ni Eman.
Suno pa sa kampo ni Eman, sa pihak sang makapila nga beses nga rabbit punches, wala sang ginhatag nga warning ukon penalty ang referee sa iya nga kontra.
Ginpahayag man ni Dino nga nagreklamo si Eman samtang nagahamapang nga nagapalanakit ang iya nga lawas.
Suno sa iya, nagpadailom naman sa CT scan ang boksingero kag ginahulat pa ang resulta.
Samtang, agud mapabilin ang integridad sa proseso, indi pa magahatag sang pahayag ang GAB angot sa kaundan sang kaso samtang wala pa sang pinal nga resolusyon.
