Natalana na nga maglupad sa Manila si Jan Marie Bordon ang nagarepresentar sa Bacolod City para sa Miss Universe Philippines 2023 para sa training bangod madamo pa ini sang kinahanglan ma-improve antes pa ang pageant.
Sa interview sang Bombo Radyo Bacolod kay Bordon, pahayag sini nga bilang preparasyon siya ang natalana pa nga magpatigayon sang photo shoot sa masunod nga semana.
Samtang hanason naman sini ang kaugalingon sa pasarela, question and answer, personaldevelopment, styling kag make-up sa bulig sang Aces and Queen.
Dako nga prebilihiyo para kay Bordon ang marepresentar ang Bacolod City sa national pageant samtang ang mga nagasulod nga oportunidad kaupod sini ang ginakabig naman sang kandidata nga bugay sang Diyos.
Blessed naman ini sa La Consolacion College – Bacolod nga nagpakita gid sang dako nga suporta sa iya partikular na ang Tourism Department.
Apisar nga natalana ini kuntani nagpatigayon sang On the Job Training (OJT), ginhatagan naman ini sang iya adviser sang kahigayunan nga makafocus sa pageant kag sa masunod nalang iga-comply ang OJT.
Magluwas sa eskwelahan, dako man ang pagsuporta sa iya sang Bacolod City Government.
Suno kay Bordon, siya ang nagpatigayon sang courtesy call kay Bacolod City Mayor Alfredo “Albee” Benitez tinalikdan nga semana kun sa diin gin-estoryahan nila ang mga matabo sa pageant, kag ang alkalde man ang nagprovide sang expenses sini para sa pagtinir sa Manila kalakip na ang mga dress kag national costume.
Natalana naman ang coronation night sa Abril apang wala pa sang mga nakalatag nga exact schedules para sa pre-pageant.
Pahayag ni Bordon nga ang nagakabatun sini nga suporta amo ang nagamotibar sa iya nga ihatag ang best kag tinguhaan sini nga mahatag sa syudad sang Bacolod ang korona sa national pageant.
