Ginkoronahan ang kandidata sang Victorias City nga si Kyla Rose Romarate bilang Lin-ay sang Negros 2024 kadungan sang coronation night sa Panaad Park and Stadium kagab-i kun sa diin ginpierde sini ang 28 ka iban pa nga mga kandidata.
Sa final round sang question and answer portion kun sa diin ang Top 5 ang nagsabat, ginpamangkot ang mga ini, bilang isa ka “Babaeng Negrosanon”, ano ang buot-silingon sang Abanse Negrense?
Ginasabat ini ni Romarate nga bilang isa ka isa ka beauty queen kag future veterinarian, nagapati ini nga ang Abanse Negrense ang indi lamang para kag limitado sa mga tawo kundi para tanan nga species lakip na ang mga kasapatan.
First runner up naman si Zoe Clarisse Limson sang Cauayan.
Second runner-up si Patricia Ysabel Galapino sang Ilog.
Third runner-up ang Lin-ay sang Talisay nga si Roshyn Kate Jamantoc.
Samtang fourth runner-up si Gelisa Marie Nangan sang Hinigaran.
Nakuha man ni Romarate ang Best in Festival Costume (City Seal Category) kag Best in Evening Gown Designer awards.
Suno sa Victorias City Information Office, ini na ang ikatatlo nga kahigayunan nga nakuha sang ciudad ang nasambit nga korona.
Ang coronation night sang Lin-ay sang Negros ang ginpatigayon sa Panaad Park and Stadium kagab-i kag ini ang ginpasakupan sang 29 ka mga kababainhan nagikan sa ila tagsa-tagsa ka mga banwa kag ciudad sa Negros Occidental.
