Kaangay nga nangin comedy ang ginpatigayon nga operation sang Little Elm Police Department sa Amerika, matapos nila ginsalbar ang isa ka kanding sa kilid sang highway.
Bangod nahadlok ang pulis nga uyatan ang kanding, nag-ayo ini sa sapat nga mag-upod na lang sa ila sa pagbyahe.
Sang nasakay na sang pulis ang kanding sa ila police mobile, ginbasahan pa nila ini sang iya Miranda rights.
Ginpost nila sa social media ang kanding agud makit-an ang tag-iya.
Mensahe sang Little Elm Police Department, nakadetain ang kanding bangod sa krimen nga tuman ka gahod, kag pagka-cute.
Temporaryo nga ginpaidalum ang kanding sa kustodiya sang Animal Control sa Denton County, Texas.
Suno sa kapulisan, irelease lamang nila ini kun makahatag sang piyansa ang tag-iya nga amo ang carrots kag sinsiro nga pagpangayo sang pasaylo.
