Temporaryo nga ginsaylo sa mga tents ang mga Internally Displaced Persons (IDPs) sang pag-alburuto sang Bulkan Kanlaon nga anay nagatinir sa Senior kag Junior High School Building sa Barangay Cabagnaan, La Castellana.
Sa pahayag ni Office of the Civil Defense – Negros Island Region (OCD-NIR) Director Donato Sermeno III, kuntani antes ang Hunyo 16 nabakante na sang mga evacuees ang mga classrooms bangod ini ang gamiton na sang Department of Education sa pagsugod sang School Year 2025-2026.
Apang naghatag man sang konsiderasyon ang DepEd kag na-extend ang ila pagtinir sa buluthuan samtang ginatukod pa ang sayluhan nga tents.
Suno kay Sermeno, iban nga mga evacuees ang gintransfer sa mga tents, nga yara sa sulod sang gym ukon covered court.
Samtang ang mga evacuees gikan sa Brgy Cabagnaan ang wala sang masayluhan bangod gutok na ang gym gani ang tents ang ginhamtang lamang sa gwa.
Pila sa mga tents ang may buslot kag nagatulo kun mag-ulan, nga ila naman ginhatagan sang tarpaulin agud matabunan.
Apang isa sa problema sa karun bangod duta ang idalom kag nagalutak kun mag-ulan.
Nagrequest naman sa ila si La Castellana Municipal Mayor Rhummyla Nicor Mangilimutan kun mahimo mahatagan sang folding bed ang mga evacuees.
Pasalig ni Sermeno nga temporaryo lamang ang mga ini sa area, kag pangitaan man nila gilayon sang mas maayo nga masayluhan
