Wala na sang iban pa nga aktibidad ang Bulkan Kanlaon matapos ini mag-alburuto kahapon sang kaagahon magluwas nalang sa ash emission ala 1:00 kahapon nga nagdugay sang masobra 30 minutos.
Sa interview sang Bombo Radyo Bacolod kay Pearly Sianson, Science Research Specialist sang Kanlaon Volcano Observatory, wala naman sang iban nga aktibidad ang bulkan kahapon magluwas sa pagpagwa sang abo.
Suno kay Sianson, ang light eruption kahapon ang indi pa culminating eruption gani kinahanglan nga mag-aligmat.
Bangud nagapabilin sa alert level 3 ang Bulkan Kanlaon mahimo sa gihapon magexpect sang maabot nga volcanic eruptions.
Suno diri, ang reported nga apektado sang ashfall ang banwa sang La Castellana, ciudad sang La Carlota kag Bago City.
Nagpanugyan man ini nga magsuksok sang facemask kag kun wala sang facemask mahimo ang mga ini nga maggamit sang basa nga tela agud nga maproteksyunan ang ila nga kaugalingon nagikan sa baho sang asupre.
