Ginpahayag ni Presidente Rodrigo Duterte kahapon nga sarang sini madesisyunan ang mangin kapalaran sang e-sabong ukon online cockfighting operations subong nga Lunes, Mayo 2 kasunod sang pagtuon nga ginpatigayon sang Department of the Interior and Local Government (DILG).
Suno kay Duterte, ginmanduan sini si DILG secretary Eduardo Ano nga magpatigayon sang survey sa industriya, ginhatag ang iya nga network sa local units, gintipon ang feedback sa mga syudad kag probinsya nahanungod sa nasambit nga mga operasyon.
Kadungan sa pag-inspeksyon sa Overseas Filipino Workers (OFW) Hospital sa Pampanga, ginpahayag sang presidente nga yara na sa iya nga lamesa ang rekomendasyon gani subong nga adlaw mahimo na nga mahibaluan kun ini ang padayunon ukon untaton.
Sa nasambit nga event, ginpahayag man ni Duterte nga ang e-sabong operations ang dapat nga yara gihapon sa idalum sang Philippine Amusement and Gaming Corporation (PAGCOR) agud nga ang ahensya ang may centralized data sa gaming operations.
Sa idalum sang iya nga mandato, ang PAGCOR ang required nga magregulate sang gaming industry, mag-generate sang revenues para sa socio-civic and national development programs sang Philippine Government kag magbulig sa pagpromote sa tourism industry.
Sa ulihi nga data, ang ahensya ang nakaganar sang kapin P18 billion nga revenues para subong nga tuig as of April 25 kun sa diin may ara sang 90 tubtob 100 porsyento nga operasyon.
Ini ang ginalauman nga magsaka pa sa second half sang tuig.
