Ginabanta nga kapin P80,000 ang balor sang kahalitan nga gintuga sang pagkasunog sang isa ka kapehan sa Cadiz City Public Market kahapon.
Sa interview sang Bombo Radyo Bacolod kay Senior Fire Officer 3 Vic Cordero, fire marshal sang Cadiz City Fire Station, nagtawag sa ila ang isa ka security guard agud magpahibalo nga may nasunog nga stall sa tindahan kag gilayon sila nga nagresponde.
Wala man nagdugay kag napalong ang kalayo apang ang kapehan nga ginapanag-iyahan ni Joel Payurina ang natupok samtang partially damaged naman ang kaingod sini nga stall nga ginhimo man niya nga store.
Suno kay Cordero, wala naman sang iban nga stall nga nadalahig nga nasunog bangud napalong gilayon ang kalayo.
Santo sa inisyal nga report, short circuit ang ginhalinan sang sunog apang nagapadayon pa ang imbestigasyon kag ginahulat pa ang affidavit of loss agud nga makita kun pila ang tul-id nga kantidad sang damage sang sunog.
