Nakapasar sa 2023 Licensure Examination for Teachers ang kapid nga sanday Donnabelle kag Donnajean Fernandez kun sa diin isa diri ang nagrank 10.
Sa interview sang Bombo Radyo kay Donnabelle Fernandez, indi sini kuntani luyag nga magkuha sang education nga kurso apang ang kapid naman sini ang luyag nga mangin isa ka manunudlo.
Bangod sini nag-upod na lang ini sa iya kapid kag sila nga duha ang pareho nga nagpa-enroll sa Bago City Collge sa kurso nga Bachelor of Secondary Education Major in Social Studies.
Suno diri sang iya nahibaluan nga nakapasar ini kag nangin rank 10, nagdalagan ini sa iya iloy kag amay kag naghakos bangod sa kasadya apang indi gid man sadto tuman ka dako ang iya kalipay bangod wala pa nila nakita ag pangalan sang iya kapid.
Sang nakita na ang pangalan ni Donnajean, didto na nkag nagtumno-tumbo ang mag-utod bangod sa tuman nga kalipay.
Pahayag ni Donnabelle antes pa man maggwa ang result, nagakabalaka ang kapid niya bangod sa pagpati sini nga madamo siya sang sala nga answer apang nakapasr man ang ini. gani proud si Donnabellle sa iya kapid.
Mensahe sini sa tanan nga magakuha sang board exam, amo nga magtinguha sa pagtuon bangod sa ulihi ang naagyan nga kabudlayan ang mabayaran sang kadag-an.
Samtang, suno naman kay Donnajean, nakita sini mismo ang pagtinguha sang iya utod sa pagtuon humalin alas 7:00 sang aga tubtob alas 10:00 sang gab-i amo nga naekspektaran na sini nga makapasar ang iya kapid.
Suno diri, sadto pa man sang sila naga-eskwela pa, nakita sini kun paano gintulod ni Donnabelle ang iya kaugalingon nga magtuon.
Si Donnabelle ang naggradwar bilang magna cum laude samtang si Donnajean naman ang naggradwar bilang cum-laude sang Bago City College.
