BACOLOD CITY — Desidido ang pamilya Prayco sa Barangay E. Lopez, Silay City nga magpasaka sang kaso batok sa nagpabaya nga mga medical personnel sang Teresita Lopez Jalandoni Provincial Hospital nga nagresulta sa kamatayon sang kapid nga lapsag sang iloy nga si Remarie.
Ang manugbata nga iloy ang gindala sa ospital sang Hunyo 27 sang hapon bangud nagasakit na ang tiyan sini.
Pag-abot sa ospital, nakit-an sang mga doktor nga 5 centimeters na ang cervical opening samtang yara ini sa labor room kag ginasekyar ni Dr. Maramba.
Sa panaysayon sang iloy nga si Elisa Prayco, naggwa ang panubigan sang iya anak sang Hunyo 28 sang hapon apang wala pa naggwa ang lapsag.
Pagkagab-i, nagreklamo na ang iloy nga maluya na ini kag nagpangabay nga ipaidalom nalang sa Ceasarean section.
Apang ginsabat ini sang midwife nga si Nieve Villalon nga indi sarang mapaidalom sa CS bangud wala sila sang kwarta nga inugbayad.
Hunyo 29 sang aga, napagwa ni Prayco ang isa ka lapsag apang patay na ini.
Diri nagdesisyon ang doktor nga si Dr. Suelto nga patigayunon ang CS.
Wala naabutan nga buhi ang ikaduha nga lapsag bangud ginbawian naman ini sang kabuhi.
Ang bana ni Remarie ang nagtaliwan sang Hunyo 20 kag ginlubong sang Hunyo 30, dungan sa nagkalamatay nga kapid.
