Ginpahayag sang nadakpan nga kawatan sang cable wire sang Telecommunication company nga ang rasun sa pagpangawat sini amo ang kapigaduhon, bisyo kag impluwensya sang iban nga tawo.
Si Romel Ellena ang nadakpan sa akto nga nagapangawat sang 50 metros nga copper wire sang Globe Telecom Inc. sa Bangga Cegasco, Araneta Street, Barangay Pahanocoy, Bacolod City sang Sabado sang gab-i nga nagabalor sang P35,613.
Sa interview sang Bombo Radyo Bacolod kay Ellena, magkaupod sila sang ginkilala nga si alyas Erwin sa pagpangawat kun sa diin ang kaupod ang nagserbe nga look-out samtang siya naman ang nagsulod.
Apang sa pag-abot sang mga katapo sang Bacolod Police Station 8, nakapalagyo si Erwin apang ini ang nabilin kag nadakpan.
Suno sa iya si Erwin amo ang nagplano sang pagpangawat kag makapila naman ini nga nagpabalikbalik sa lugar sa pagcutter sang kable samtang ang gwardya nga ginatawag sini nga “kas-a” amo ang nagreport sa ila.
Paathag ni Ellena nga bag-o pa lamang ini sa pagpangawat kag wala man ini sang grupo apang apat sila ang kawatan sa Abada Escay sa Barangay Vista Alegre.
Apang magluwas sa ila may iban pa nga mga grupo nga nagapangawat.
Paathag pa sini nga siya ang nagsulod sa pagpangawat sang kable bangod may naghambal sa iya nga wala na sang may magareklamo bangod natalana na nga islan ang mga kable sang fibre.
Sa pihak nga bahin, siya ang isa naman ka construction worker kag sidelines lamang sini ang pag-upod kay Erwin.
Ang asawa ni Ellana ang nagabusong naman sa karun sang pito ka bulan.
Paathag sini nga ginahinulsulan na niya ang nahimo ilabi na nga may mga nauna na ini nga mga kilala nga nadakpan na kag napriso.
