Mensahe sang isa ka Public Servant sang ciudad sang Silay nga indi rason ang kapigaduhon sa paglab-ot sang handum.
Sa interview sang Bombo Radyo kay Ghiemon Gallego Escobidal, siya ang nagbaton sang Most Dedicated Youngest Public Servant of Silay City, matapos nga nagtrabaho ini sa Mayor’s Office sa edad nga 22 anyos, kag ginkilala nga pinakabata nga empleyado sang Silay City Government.
Nagbaton man ini sang award nga Outstanding Educator of the Year kag national awards.
Suno diri, ang ginikanan sini ang nagatrabaho bilang mangunguma kag kun ini magpadulong sa eskwelahan nagahulat lamang ini sa magalabay nga truck kag magsakay, kun kaisa naman siya ang ginadul-ong sang iya amay, apang sa tion nga mag-ulan, siya ang naga-eskwela nga basa.
Nahimo man sini magtrabaho samtang naga-eskwela kaangay na lamang sang call center, photographer, emcee kag online selling.
Sa karun, sa ila lugar siya pa lamang ang naka gradwar sa college nga may four year course.
Nahimo man sini sadto magpalapit kag mangayo sang bulig gikan kay Silay City Mayor Joedith Gallego, Bacolod City Mayor Alfredo Albee Benitez kag Negros Occidental Governor Eugenio Jose Bong Lacson, para makapadayon sang iya pag-eskwela sa kolehiyo.
Samtang, wala naman ini nagpahibalo nga siya nagkuha sang board exam kag ginsurprise ang iya ginikanan sang siya nakapasar.
Mensahe sini, amo nga magpadayon lamang bangod ang yabi sang kadalag-an ang yara sa aton tanan.
