Padayon pa ang imbestigasyon sang 79th Infantry Battalion (IB) kun may kaangtanan ang New People’s Army (NPA) sa pagpatay sa sa isa ka negosyante sa Purok Kawayan, Barangay Bug-ang, Toboso, Negros Occidental, sang Lunes.
Ang biktima ang ginkilala nga si Juvie Sarona, 42 anyos, pamilyado kag may-ara sang lumber business.
Ginpaarakan sang tiro sang armado nga grupo si Sarona kun sa diin ini ang nakaangkon sang igo sa ulo, dughan kag butkon nga gintunaan sang gilayon nga kamatayon.
Sa interview sang Bombo Radyo Bacolod kay Lt Col. J-jay Javines, pinuno sang Division Public Affairs Office sang 3rd Infantry Division sang Philippine Army, ginkumpirmar sini nga may yara pa sang mga nabilin nga miyembro sang Northern Negros Front (NNF) sang NPA sa banwa sang Toboso.
Suno diri, may yara pa sila sang mga nabilin nga miyembro sang NNF sa area nga padayon nila nga ginalagas pa.
Pahayag ni Javines ang mga remnants ang mga kaupod ni Arnel Tapang, nga may yara sang patong sa ulo ukon padya nga P1 million kag Enero 2023 sang nadakpan ang tatlo ka high-ranking members sang dismantled nga grupo sang NNF nga sanday Felix Susas Jr., alias “Rigor/Budok,” sekretarya sang NNF kag former commanding officer sang Regional Security Force-Komiteng Rehiyon Negros; Cherryl Catalogo, alias “Celo,” NFF education staff; kag Jalen Susas, alias “Cristel/Izumi/Cg,” NFF medical and education staff.
Dugang pa sini, nakabaton sila sang report nga may yara sang ginpadala nga bag-o nga miyembro gikan sa Regional Security Force-Komiteng Rehiyon Negros agud magserbe bilang bag-o nga sekretarya sang NNF nga amo si “Loydie”, agud liwat nga matukod ang nadismantle na nga grupo.
Ila sa karun ginahatagan sang importansya ang pagpugong sa posibilidad nga liwat nga magtindog ang makawala nga grupo.
Samtang, suno kay Javines, ang negosyante nga si Sarona nga ginpatay sang armado nga grupo ang mabuot nga tawo kag ini maayo sa mga kapulisan kag suldado.
