Ginabanta 15,000 ka delegates sang Negros Island Region ang magapartisipar sa labing una nga Negros Island Regional Athletic Association Meet (NIRAAM) kun sa diin ang Bacolod City Government ang natalana nga magahost sang pahampang.
Suno kay Secretary to the Mayor Atty Marty Go, ginalantaw nga sa katapusan sang Pebrero amat-amat na nga maga-abot sa ciudad ang delegasyon gikan sa Negros Occidental, Negros Oriental kag Siquijor.
Suno diri, 12 ka billeting area ang gamiton gikan sa mga buluthuan sa ciudad.
Sa Biyernes, makigkita ang Department of Education Division of Bacolod kay Mayor Greg Gasataya agud maesturyahan ang NIRAAM nga maga-umpisa sa Marso 1 tubtob Marso 7 kag kun ano ang matabo sa klase samtang ginagamit ang mga buluthuan.
Tuyo man sang alkalde nga imbitaron ang mga transport association para wala sang may matabo nga pagsaka sang pletehay.
Samtang, plano man sang City Government nga imbitahan si Secretary of Education Sonny Angara para sa NIRAAM.
May yara sang nagkalain-lain nga playing venues para sa mga pahampang sa ciudad sang Bacolod, Talisay, Silay kag Victorias para sa nagkalain-lain nga pahampang kaangay sang archery, arnis, badminton, baseball, basketball, boxing, chess, dance sports, football, futsal, gymastics, billiards, paragames kag iban pa.
Pahayag ni Go, wala pa nadesisyonan kun ano ang color sang delegates sang Bacolod City apang may ginpasa nga design nga nagaduag sang orange, white kag black.
