Ginkalipay sang City Administrator sa ciudad sang Bacolod nga nagkooperar ang mga market vendors sa tatlo ka dalagko nga public markets sa ciudad sa ginpatigayon nga surveillance testing.
Sa interview sang Bombo Radyo kay City Administrator Em Ang, ginpahayag sini nga ang nakuhaan sang swab test sa tatlo ka mga merkado ang may kabug-usan nga 1,786 ka mga vendors nga ginalakipan sang 695 nagikan sa Libertad Public Market, 600 sa Burgos Market kag 491 sa Bacolod Central Market.
Suno kay Ang, may pila pa ka mga market vendors ang wala na ma-swab bangod tuman na ka kapoy ang mga medical personnel.
Ginakalipay man sini nga nadugangan pa ang masobra 1,200 ka mga vendors nga nagkumpirmar sang Huwebes nga magapakuha sang swab.
Nagapati ang city administrator nga madamo ang nagdesisyon nga magpa-swab test matapos makita nga madasig lang ini kun himuon kag indi masakit.
Dugang pa sini nga pila lang ka minuto ang pagkuha sang swab kag makabig nga mas madugay pa ang nangin pila.
Naglibot naman si Ang sa mga merkado nga nagpatigayon sang surveillance testing kag nakita nga matawahay ang dalagan sang aktibidad.
May gamay lang nga nangin delay sa bahin sang Libertad Public Market bangod sa nagluntad nga lightning rally sang aga nga nagapang-engganyo sa mga market vendors nga indi magpakigbahin sa swab testing.
Nagapati naman si Ang nga nangin mabinungahon ang isa ka semana nga delay bangod nahimu pa sang mga ini nga malibot ang mga merkado agud nga maghatag sang paathag.
Suno diri, nakigkita ang mga eksperto nga nagikan sa Cebu nga ginpadala sang national government sa ciudad sa mga market supervisors para mapaathag ang pagahimuon nga surveillance testing kag ang bentaha sini.
Gilayon nga ginhatagan sang market pass kag signage ang mga nakatapos sang swab test sa ginpatigayon nga surveillance testing sa mga mayor nga merkado sa ciudad kahapon.
Suno sa City Administrator, ang signage nga may nakasulat “compliant” ang igabutang sa mga stall sang mga market vendors bilang pamatuod nga ang nagabaligya ang nakuhaan na sang swab sample.
Samtang nag-overtime naman ang mga personnel sa City Health ang pagsegregate sa mga specimen agud nga gilayon nga mapadala sa Cebu agud nga maproseso.
Ang resulta ang ginalauman nga mapagwa sa sulod sang 12 tubtob 24 ka oras matapos nga mabatun sang laboratoryo ang mga specimen sample, gani ginalauman nga mapagwa na ini bwas nga adlaw ukon sa Martes.
