Malapit P200,000 nga balor sang illegal nga droga ang kabug-usan nga nakompiskar sa buybust operation nga ginpatigayon sang Ilog Municipal Police Station, Pontevedra Municipal Police Station kag Talisay City Police Station.
Sa operasyon nga ginpatigayon sang Ilog Municipal Police Station sa Sitio Malabong, Brgy. Andulauan, Ilog, nadakpan si Ricky Tanguar, 24 anyos kag residente sang Purok Paglaum, Barangay 2, Kabanklan City.
Nakuha sa iya paghinakop ang isa ka gamay kag isa ka dako nga heat-sealed transparent plastic sachet sang suspected shabu nga nagabalor P30,000.
Samtang P10,000 naman ang balor sang illegal nga droga nga nakumpiskar sa ginpatigayon nga buybust operations sang Pontevedra Municipal Police Station sa Gomez Street, Brgy 1-Poblacion, Pontevedra.
Ginkilala ang suspetsado kay Micol Vincent Yu, 33 anyos kag residente sang Burgos Street, corner San Agustin, La Carlota City.
P150,000 naman ang balor sang illegal nga droga nga nakumpiskar sang Talisay City Police Station sa buybust operations sa Purok Kabukalan, Brgy. Zone 10, Talisay City.
Ginkilala ang suspetsado kay Aracelo Soliza, 53 anyos kag Errol Vargas, 39 anyos kag mga residente sang Purok Kabulakan, Brgy. Zone 10, Talisay.
Nakuha sa ila paghinakop ang 15 ka heat-sealed transparent plastic sachet sang suspected shabu.
Sa karun, nakahunong ang mga suspetsado sa Ilog Municipal Police Station, Pontivedra Municipal Police Station kag Talisay City Police Station kag natalana nga pasakaan sang kaso nga paglapas sa Republic Act 9165 ukon Comprehensive Dangerous Drugs Act of 2002.
