Kapin sa 20,000 ka mga botante sa ciudad sang Bacolod ang natalana nga ideactivate matapos nga wala makaboto sa duha ka election period.
Suno kay Bacolod City Election Officer Atty Katrina Trinio Cania, padayon ang ila nga registration kag Election Registration Board (ERB) hearing.
Suno diri, 9,500 ang ginavalidate sa karun sa ERB humalin sang Oktubre 20 tubtob Disyembre 31, 2025.
Ginalauman naman nga kapin sa 8,000 ang madugang nga registered voters sa ciudad.
May yara sang ginabanta nga 20,000 ka deactivated voters nga mahimo man makapa-reactivate sa COMELEC.
Suno kay Cania, may yara sila sang satellite registrations apang nagalibot -libot man sila sa mga Barangay.
Napadulongan na nila ang Brgy Mansilingan kag Pahanocoy kag sa Sabado plano naman nila nga magpadulong sa Brgy Estafania.
Samtang, nagpasalig naman ini nga mangita sang mas malapad nga venue para sa satellite registration agud malikawan ang kaangay nga natabo sang tinalikdan nga nagginutok ang mga tawo nga nagresulta sa kinagamo kag pagkalipong sang mga registrants.
