Gintupok sang kalayo ang kapin 30 ka balay sa 16th street, purok Magnolia, barangay 7, Bacolod City sa sunog nga nagluntad kaina alas- 11:20 sang udto.
Sa interview sang Bombo radyo kay Benjie Alojado nga construction worker, nagatrabaho ini sa isa ka building sang nag-umpisa ang sunog sa isa ka balay nga malapit lang sa ila.
Suno diri, magamay lang ang kalayo apang bangod sa makusog nga huyop sang hangin madasig nga gindakop sang kalayo ang mga kahoy sa mga balay amo nga madasig ang paglapad sang sunog.
Plano kun tani nila gamiton ang hose agud papiswitan sang tubig ang kalayo apang nadula ang kuryente amo nga wala na sang tubig nga nag-ilig.
Suno kay Alojado, maayo lamang madasig ang pag-abot sang Bureau of Fire Protection kag nakontrol ang paglapta sang kalayo.
Iban sa mga pumuluyo ginbuksan ang ila mga kwarto kag may yara pa sang nagdesisyon nga gub-on na lang ang ila bintana agud ligwa ang alagyan sang mga bumbero.
Nagsaka ang mga bumbero sa atop sang mga balay samtang nagbululigay man ang mga pumuluyo sa pagbasya sang tubig. Samtang,
Masobra 70 ka pamilya ang apektado sa sunog nga nagluntad sa purok Magnolia, barangay 7, Bacolod City kaina alas- 11:20 sang udto.
Sa interview sang Bombo Radyo kay punong barangay Hercy Sibug, amat-amat na nga ginalista ang mga pumuluyo nga nasunogan samtang yara naman sa area ang Department of Social Services and Development-Bacolod City kag si Disaster Risk Reduction and Management Office head Anna Maria Laarni Pornan.
Bangod kalabanan sa mga residente wala pa nakapanyaga, ginhatagan sila sang barangay sang tubig kag tinapay kag may food packs man gikan sa opisina ni Bacolod City Lone District representative Albee Benitez.
Temporaryo nga ginpatinir ang mga pumuluyo sa covered court kun diin nila tingob nga ginbutang ang mga nasalbar nga gamit.
Ginakasubo ni Sibug ang natabo kag nagpasalig ini nga mabulig ang barangay sa mga nasunogan.
Pahayag sini, iya ginapangabay nga mangin leksyon ang natabo nga sa masunod maghalong na ang mga pumuluyo.
