Malapit 30 ka mga trabahador sa Hacienda ni Aurelio Gerardo Valderrama Jr., National President sang Confederation of Sugar Producers Association Inc. (CONFED) ang nagreklamo angot sa alegasyon nga wala sila ginasweldohan sang insakto kag wala man sang benepisyo.
Una na nga nag-file sang complaint ang grupo sa National Labor Relations Commission (NLRC).
Ginpahayag sang mga ini nga ginsweldohan sila sang manubo santo sa mandated wages kag wala man sang statutory benefit lakip na ang 13th‑month pay.
Wala man sila sang may nabaton nga carabao share kag 3 percent nga bahin sang mga mamumugon sa Sugar Amelioration Bonus.
Suno kay legal counsel Atty. Clarence Gordoncillo sang National Union of Peoples’ Lawyers (NUPL)‑Negros, ang mga mamumugon ang makabig nga regular workers kag indi seasonal workers.
Dugang pa, ang mga ini ang mga may ginagastohan nga pamilya gani sila ang dapat hatagan man sang kompleto nga sweldo kag benepisyo kag kilalahon ang ila kinamatarong bilang mga mamumugon.
Ginpasalig sang abogado nga buligan ang mga ini kag mapamatian gid ang ila bahin.
Suno naman sa isa sa mga trabahador, nagkadto sila sa Department of Labor and Employment (DOLE) agud mangayo sang abiso angot sa ila reklamo kag sila ang nakita ni Atty Gordoncillo.
Gani sila ang nakalab-ot sa media conference kag didto ginpabutyag ang ila kalain sa boot batuk kay Vallederrama nga amo ang sugar leader nga naga serbe nga amo.
Ini ang masobra 20 ka tuig nga nagatrabaho sa hacienda kag luyag kuntani sini nga mahatagan sang insakto nga benepisyo.
Apang ginpahayag sini nga bisan gamay nga dugang sa sweldo indi maghatag si Valledarrama.
Sa kaangot nga balita, ginpasalig ni Noli Rosales sang Kilusang Mayo Uno nga ano man nga mga reklamo ang ginpasaka sang mga mamumugon sa DOLE batok kay Vallederrama ang ginpalab-ot man kay Agriculture Secretary Francisco Tiu Laurel.
Suno kay Rosales, isa sa mga reklamo sang grupo amo ang kulang nga sweldo, benepisyo kag 13th month pay.
Lakip man diri ang indi pagpaambit sa ila sang carabao share kag 3 percent nga share sa Sugar Amelioration Bonus.
Suno kay Rosales, bilang anay katapo sang Sugar Board kag lider sang sugar group kag ginkilala bilang dako nga opisyal sang CONFED, nakahibalo dapat si Valderrama sa mga layi.
Suno diri, masakit para sa mga ordinaryo nga mamumugon nga sila ang gina-into lang bangud wala sila nakahibalo sang ila kinamatarong.
Dugang pa, dapat ang mga ini ang indi pag-abusuhon bangud paagi sa pagpangabudlay sang mga mamumugon nangin manggaranon ang mga dako nga opisyal.
Paathag sini nga dapat si Valderrama ang mas nakahibalo sa husto nga paghtaag sang benepisyo kag sweldo.
Sa pihak sini, pahayag ni Rosales nga ipadala ang reklamo nga pirmado sang mga mamumugon sa masunod nga adlaw.
