Nakasikop sang 286 ka mga campaign posters ang Commission on Election – Bacolod sa una nga adlaw sang implementasyon sang Operation Baklas kahapon.
Madumduman nga nagsugod man ang Operation Baklas kadungan sang pag-umpisa sang campaign period para sa Senatorial Candidates kag Partylist Representatives.
Sa interview sang Bombo Radyo Bacolod kay Bacolod City Election Officer Atty Revo Sorbito, ang ila Operation Baklas ang ginsuguran alas-8:00 kahapon sang aga sa dalan gikan sa Old Bacolod City Airport padulong sa Lacson Street.
Ang mga ini ang nakapangpalos sang campaign posters sa mga poste, pader, street lights kag mga kahoy.
Paathag ni Sorbito nga indi mahapos ang pagpangbaklas bangod may mga posters nga gintakod sa mataas nga bahin, gani ginakinahanglan pa nga maggamit sang hagdan, nga kun kis-a makatuga man sang traffic.
Nagapadugay man sa operasyon ang mga gintapik-tapik nga posters kag ang tuman ka pag-on ang paglansang ukon paghigot sang alambre.
Sila ang isa lamang sa isa ka semana makapatigayon sang Operation Baklas bangod ang Comelec ang madamo man sang iban pa nga obligasyon.
Suno kay Sorbito, ang mga nakumpiskar nga campaign materials ang ila ipadala sa Comelec National Office.
Ini agud inkaso magdangat sa pagfile sang kaso, sila ang may magamit nga ebidensya.
Pinakamadamo sa mga campaign posters nga nakuha ang gikan sa mga partylists partikular na sang Uswag Ilonggo kag Nanay Partylist.
Suno diri, kalabanan sa ila nga ginpangpalos ang madugay na nga natakod, apang indi paman sila makahimo sang tikang sang tinalikdan bangod wala pa sang nakomiter nga campaign violation tubtob wala pa ang campaign period.
Ang campaign period para naman sa local candidates ang magasugod naman sa Marso 28.
