Nagpangayo man sang assisstance ang Bacolod Traffic Authority Office sa Iglesia Ni Cristo para sa pagmanage sang trapiko kag parkings sa patigayunon nga National Rally for Peace sa Negros Occidental Provincial Capitol Lagoon sa Lunes, Enero 13.
Sa interview sang Bombo Radyo Bacolod kay BTAO Deputy Head Jose Antonio “Jojo” Robello, ginapanawagan sini sa mga motorista nga kun mahimo magpangita sang alternative routes kaangay sa Bacolod Negros Economic Highway (BANOCEH), bangod malauman na ang mabug-at nga trapiko.
Ini kasunod sang pahayag sang INC organizers nga 70,000 ang crowd estimate sa aktibidad kag magadangat sa tres mil ang mga salakyan nga magasulod sa ciudad.
Kun may padulungan, panugyan ni Robello nga temporanuhan ang pagbyahe ukon ikanselar na lamang ang appointment.
Suno diri, bangod sa kadamuon sang masulod nga salakyan, kag gina-ekspektar nga paggutok sang trapiko, sila ang nagpangayo man sang assistance gikan sa Society of Communicators and Networkers (SCAN) International sang Iglesia Ni Cristo.
Nagkoordinar naman ang mga ini sa mga malls kaangay sa SM City Bacolod, Ayala Capitol Central kag BazKet BCD sa pagpagamit sang parking spaces bangod tuman ka gamay ang parking spaces sa area.
Panawagan sini sa organizers nga maseguro nga wala sang obstruction sa dalan, magiyahan kun diin dapat kag indi dapat magpark, ilabi na nga kadam-an sa mga partisipante ang gikan sa gwa sang Bacolod kag wala pa nakahibalo sa mga pagsulundan sa ciudad.
