Kapin 400 ka mga persona ang nadakpan nga nagbayolar sang ginapatuman nga social distancing kag mandatory wearing of facemask sa ciudad sang Bacolod kahapon.
Sa interview sang Bombo Radyo Bacolod kay Police Lt. Col. Ariel Pico, spokesperson sang Bacolod City Police Office (BCPO), ginpahayag sini nga seryoso ang kapulisan sa pagpangdakop sa mga wala naga-obserbar sang social distancing subong man sa mga wala nagasuksok sang facemask.
Ginkumpirmar man sini nga humalin sang Mayo 20, may yara sang quota ang mga station commander angot sa mga violators.
Madumduman nga sang Miyerkules, nagdangat sa 206 ang nagkaladakpan nga mga violators kag sa pinakaulihi nga data nga nakuha ni Pico kahapon, naglab-ot sa 347 ang mga nagkaladakpan.
Suno sa tagpamaba, wala gina-detain ang mga violators bangud sa COVID-19 threat apang ginpasiguro sini nga pasakaan sila sang kaso on regular basis santo sa direktiba ni BCPO director Col. Henry Biñas.
Nahibaluan nga mahimo sila kasuhan sang pagbayolar sang Article 151 sang Revised Penal Code ukon ang disobedience to person in authority in relation and connection sa executive order No. 35 ni Mayor Evelio “Bing” Leonardia.
Mahimo sila nga magpangatubang sang isa tubtob anom ka bulan nga pagka-priso kag multa nga 10 mil pesos tubtob P30 mil.
