Gindayaw man ni Father Ritchel Tabanyag, in-charge sa seguridad sa arrival ni Most Rev. Louie P. Galbines, D.D., ang ikapito nga obispo sang Diocese of Bacolod sa San Sebastian Cathedral kahapon, Agosto 10.
Sa interview sang Bombo Radyo Bacolod kay Father Tabanyag, kanami kag katawhay lamang ang nangin dalagan sang aktibidad sa pag-abi abi kay Most Rev Galbines sang ini ang nagpadulong sa ciudad sang Bacolod kag nag-abot sa San Sebastian Cathedral kahapon.
Suno kay Tabanyag, ala 1:00 kahapon naglaom ang mga ini nga alas 5:00 pa makaabot sa ciudad ang bag-o nga Obispo apang nangin matawhay ang pagbiyahe halin sa Hinigaran gani temprano pa ini nakaabot.
Wala man sang trapiko kag indi man nangin tanto kainit ang panahon.
Nagpabutyag man sang kalipay ang bag-o nga obispo suno kay Tabanyag bangud sa mainit nga pag-abi abi kag wala man ini naglaom nga daw masobra pa sa ini sa artista nga ginbantayan sang mga tumuluo agud nga siya ang makita lamang.
Suno kay Tabanyag, nagdangat sa 5000 tubtob 7000 ang mga tawo nga nag-abi abi kay Galbines.
Pila sa mga obispo ang nakaabot naman kahapon kag nagtinir sa pila ka mga hotel sa ciudad.
Nag-abot man kahapon si Papal Nuncio to the Philippines Charles Brown nga gin-welcome man ni Silay City Mayor Joedith Gallego sa Bacolod-Silay International Airport.
