Kapin 80 ka mga estudyante ang nahimo nga marescue sang Bacolod City Disaster Risk Reduction and Management Office matapos ginbaha ang entrance gate sang Generoso Villanueva Sr. National High School sa Patricia Homes Subdivision sa Barangay Granada.
Sa interview sang Bombo Radyo Bacolod kay Earl Edward Ramirez, operations chief sang Bacolod CDRRPMO, alas-4:00 sang hapon umpisa nga nagsaka ang tubig-baha bangod sa madamol nga ulan.
Suno kay Ramirez, karun lamang natabo ang pagbaha sa lugar makaligad sang malawig nga tinuig.
Bangod nadungan sa buhi sang mga estudyante ang pagluntad sang baha, gilayon naman nga nagpahanumdom ang School Administration nga indi pahanugutan nga magtabok ang mga kabataan.
Pag-abot sang Bacolod CDRRMO, yara na sa hawak ang kadalumon sang tubig-baha.
Gilayon man nga nagpadala sang rescue trucks, kag ginbalik-balik na lamang ang pagpatabok sa mga estudyante kag manunudlo, nga nagdangat sa kapin 80.
Ginapakamaayo ni Ramirez nga safe ang tanan kag wala sang nadisgrasya.
Sila ang nagkoordinar naman sa Punong Barangay sa pagtumod sa rasun kun ngaa hinali na lamang ginbaha ang lugar.
Ginapahayag nga gikan sa kakampuhan nga bahin ang tubig, nagpanaog sa highway, tubtob nagdangat sa entrance gate sang eskwelahan.
