Kapin sa 90,000 ka traditional jeepney units nationwide ang nag-upod sa transport strike nga ginpatigayon subong nga adlaw.
Sa interview sang Bombo Radyo kay Piston (Pagkakaisa ng mga Samahan ng Tsuper at Operator Nationwide), national president Mody Floranda, alas- 5:00 kaina sang aga nag-umpisa ang transport strike sa National Capital Region kag sa iban nga bahin sang pungsod.
Suno diri, kapin sa 80,000 tubtob 90,000 sa kabug-usan nga Pilipinas ang nag-upod sa transport strike, samtang ginalauman sini nga magdamo pa gid ang magapartisipar sa ulihi nga adlaw sang strike bwas.
Pahayag ni Floranda, padayon ang ila panawagan para sa ila nga prangkisa kag pagparehistro.
Suno pa diri, bisan ang mga nakasulod na sa mga kooperatiba ukon korporasyon para sa Public Utility Vehicle Modernization program, ang tubtob sa karun wala nakaparehistro sang ila prangkisa.
Nakita sini mismo nga bisan ang mga kooperatiba nga nagsulod sa PUV modernization program ang indi makasarang nga magbakal sang masobra isa ka million nga balor sang modernized unit.
Suhestyon ni Floranda, kun tani nagpatindog na lamang sang industriya nga mismo ang pungsod ang mahimo sang makina para sa mga jeepneys agud nga diri sa Pilipinas makadto ang benepisyo kag indi sa mga negosyante gikan sa luwas sang pungsod.
Nagapanawagan ini kay President Ferdinand ‘Bongbong’ Marcos Jr, nga lantawon ang matuod nga sitwasyon kun ano ang nagakatabo sa transport sector.
