Kapin 100 ka mga drayber kag pinuno sang tatlo ka transport group nga nag-untat sang byahe ang nagtipon sa Bacolod City Government Center agud ipalab-ot sa alkalde sang ciudad ang ila mga sentimiyento kaina sang aga.
Sa inteview sang Bombo Radyo kay Rudy Catedral, presidente sang Bacolod Alliance for Commuters, Operators and Drivers (BACOD), wala sila nagprotesta agud magtuga sang gamo, ang luyag lamang nila bilang magagmay nga operators nga makuha ang bahin ni Bacolod City Mayor Alfredo “Albee” Benitez kag sila ang maklaruhan kun mismo ang alkalde ang nagapamatok sa pagrenew sang provisional authority.
Suno diri, extended ang byahe sang tradiitonal jeepneys tubtob sa Disyembre 31, 2023 sa idalum sang Memorandum Circular 2023-017, apang ini wala gin-implementar sang ciudad nga suno kay Catedral, sila ang ginhingyuan nga nadala sa amo nga memorandum ang Bacolod kag Iloilo bangod sa Local Public Transport Route Plan (LTPRP) kag pagpamatok ni Mayor Benitez.
Luyag gid lamang nila nga sila ang atubangon kag kuhaon ang sabat sang alkalde bilang amay sang siyudad.Ini ang kasunod sang alegasyon nga nagmeeting ang alkalde sa mga kooperatiba sa Bacolod kag gilayon nga gin-obligar nga iimplementar ang LTPRP.
Dugang pa ni Catedral, nagapangayo sila nga mga drayber kag operator sang traditonal jeepneys sang ligwa nga makarenew sang ila prangkisa kag special permit samtang ginatun-an pa ang modernization program.
Samtang, nagpanawagan si Catedral sa chairman sang Sentrong Samahan ng mga Tsuper at Operators Negros (SSTONE) Albert Villanueva kag secretary general sang United Negros Drivers and Operators Center (Undoc) Diego Malacad, kun paano nila nasambit nga wala sang problema kun ang mga miyembro sang grupo wala nakaparenew sang ila prangkisa.
Ginbulgar man ni Catedral nga peke ang mga prangkisa nga gina-uyatan sang Negros-Bacolod Transport Coalition (NBTC).
