Halos isa ka milyon ang balor sang suspected shabu nga narecover sa drug buybust operation nga ginpatigayon sa Arnaldo Street, Purok Kahirup, Barangay Singcang-Airport, Bacolod City alas-12:33 kaina sang kaagahon.
Ang subject nga ginkilala lamang nga si Alyas Ati, 27 anyos, lalaki, kag residente sa Barangay Bata, Bacolod City ang nadakpan sa akto nga nagahupot kag nagabaligya sang suspected shabu.
Ang operasyon ang ginpatigayon sang City Drug Enforcement Unit sang Bacolod City Police Office (BCPO-CDEU) kun sa diin nakumpiskar ang ginabanta 145 gramos sang suspected shabu nga may standard drug price nga P986,000.
Ang suspetsado ang yara na sa kustodiya sang BCPO kag ginapreparar na ang pagpasaka sang kaso sa paglapas sa Section 5 kag 11 sang Republic Act 9165 ukon Comprehensive Dangerous Drugs Act of 2002.
Pasalig sang BCPO nga padayun ang ila masupog nga commitment sa pag-away sa illegal nga droga kag pagpabilin sang kalinong kag kahilwayan sa Bacolod City.
