Kapin sa 8,000 ka mga indibidwal ang apektado sa banwa sang Murcia, Negros Occidental kasunod sa paglupok sang bulkan Kanlaon kahapon sang hapon.
Sa interview sang Bombo Radyo kay Murcia Mayor Gerry Rojas, apektado ang Brgy Minoyan, San Miguel, kag Lopez Jaena kun sa diin naeksperyensyahan ang ashfall sa bahin sang Brgy Minoyan.
Suno diri, naka-heightened alert na ang banwa sa pagmonitor sa sitwasyon.
Suno sa alkalde, sadto nga nagahana pa lang ang bulkan nga maglupok nagpreparar na sila sang mga kinahanglanon amo preparado sila sa karun sa pag-evacuate sa mga pumuluyo kag paghatag sang mga bulig sa mga apektado.
Kanselado man ang mga klase sa mga lugar nga apektado samtang ang iban nga buluthuan ang gamiton man bilang evacuation center.
Panugyan sini sa mga pumuluyo nga magulu-aligmat kag mangin alerto.
