Nagalaom ang Presidente sang Alliance of Hog Raisers Association of Negros Occidental nga i-lift na ang ban sang pork kag pork products sa Cebu nagikan sa Negros Occidental agud makapadayon sa negosyo sang probinsya.
Sa interview sang Bombo Radyo kay Ric Lauron, ginakasubo sini ang desisyon ni Cebu Governor Gwendolyn Garcia nga pag-extend sang ban sang live hogs kag pork products nagikan sa Negros Island tubtob Abril 20.
Suno kay Lauron, wala sila sang may mahimo sang desisyon sang gobernador kag dako ang epekto sini sa bahin sang negosyo.
Suno sa iya, nagakaigo lamang ang supply sang baboy para sa pangkonsumo sa probinsya apang sa karun, madamo sang mga festivals kag aktibidad nga ginapatigayon sa palibot sang probinsya.
Suno diri, ang mga backyard hograisers amu ang nagasupply sa local market.
Sa karun, suno sa iya, bangud sa pagban sang baboy padulong sa Cebu, ang presyo sang live-weight ang yara sa P160.00.
Nagalaom ini nga malift na ang ban agud makapadayon sa pagnegosyo ilabi na sa Carcar City.
Gina-engganyo man sini ang mga local traders sa probinsya nga pasaka-sakaon ang live-weight price.
Samtang, nagapadayon naman ang pag-export sang pork kag pork products sa Manila paagi sa container van transport para sa commercial hog raisers.
Samtang, kapin P1.3 million nga balor sang pork kag pork products ang nakumpiskar sang African Swine Fever Task Force Negros Occidental sa probinsya humalin Abril 1 tubtob Abril 10.
Suno kay Dr. Placida Lemana, sa sulod sang napulo ka adlaw, nakakumpiskar sang 27,680 packs sang nagkalain-lain nga pork kag pork products kag ini ang ginpaship pabalik sa iya ginhalinan.
May nakumpiskar man nga 178.5 kilos sang karne sang baboy kag ini ang ginsunog.
Magluwas diri, may mga ginconfiscate man ang mga pasalubong kag mga linuto nga may yara sang baboy.
Sa data sang Provincial Veterinary Office, 4,331 ka live hogs ang napagwa sa probinsya sang tinalikdan nga bulan padulong sa nagkalain-lain nga bahin sa Pilipinas apang kalabanan diri ang gin-export sa National Capital Region.
